Rannsóknir

Í Seðlabankanum fer fram margvísleg rannsóknarstarfsemi sem tengist viðfangsefnum bankans. Hún hefur hingað til farið aðallega fram innan hagfræðisviðs bankans en aukin áhersla er á rannsóknir innan fjármálasviðs. Einnig kemur fyrir að Seðlabankinn kaupi eða styrki rannsóknarverkefni aðila utan bankans.

Meðal viðfangsefna ársins 2007 má nefna áframhaldandi vinnu við nýtt þjóðhagslíkan bankans og undirbúning að þróun nýs heildarjafnvægislíkans, rannsókn á áhrifum kerfisbreytinga á innlendum húsnæðismarkaði, þróun vísbendingarlíkans fyrir innlenda hagsveiflu, rannsókn á framboðshlið lítilla ný-keynesískra heildarjafnvægislíkana og þróun nýrra gengisvoga fyrir íslensku krónuna.

Meðal helstu rannsóknarverkefna sem eru í gangi eða hófust á árinu má nefna mat á Bayesísku-spálíkani fyrir innlenda verðbólgu, mat á vaxtarófi innlendra vaxta, mat á einföldu spákerfi fyrir eftirspurn og verðbólgu og mat á margvíðu tímaraðalíkani fyrir innlendar hátíðnivísbendingar, gerð hermilíkans af íslenska fjármálakerfinu og mat á væntu og óvæntu útlánatapi viðskiptabanka. Þá hófst á árinu vinna við viðamikið rannsóknarverkefni um sérstök viðfangsefni peningastefnunnar í mjög litlum opnum hagkerfum með sjálfstætt fljótandi gjaldmiðil.

Að auki eru iðulega í gangi fjöldi smærri rannsóknarverkefni. Má þar nefna þróun á skammtímaspálíkönum fyrir undirliði vísitölu neysluverðs, mat á áhrifum erlends vinnuafls á íslenskt hagkerfi, mat á hagsveifluleiðréttingu opinberra fjármála, þróun vísbendinga fyrir húsnæðismarkað og íbúðafjárfestingu, samanburðarrannsókn á sveiflum í tekjum og neyslu, rannsókn á uppruna, samsetningu og fjármögnun viðskiptahallans og mat á upplýsingagildi fyrstu bráðabirgðatalna þjóðhagsreikninga.

Að lokum má nefna ýmiss langtímaverkefni sem hafa verið í gangi um tíma, oft í samstarfi við innlenda og erlenda fræðimenn. Má þar nefna þróun á aðferðum við mat á framleiðsluspennu, rannsókn á innlendum raunvöxtum og rannsókn á breytingum á sambandi verðbólgu og gengis krónunnar og þróun álagsprófa fyrir fjármálakerfið.